Lehen Mailako finalean, Leire Oskoz eta Naroa Agirre nagusitu ziren 22-15 emaitzarekin, Iera Agirre Iturriaga leitzarraren eta Ane Mendibururen aurka. Partidaren hasiera orekatuan izan zen, bi bikoteek tanto ederrak egin zituzten eta markagailua pare-parean mantendu zen 5-5 arte. Hortik aurrera, Oskoz eta Agirre sendo aritu ziren, atsedenaldira 8-5 aurretik iritsita.
Bigarren zatian, Oskoz-Agirre bikoteak markagailuan zuloa irekitzea lortu zuen 7-13 aurretik jarriz. Bikote gorriak ez zuen amore eman eta joko ona eginez ia markagailua berdintzea lortu zuen, 13-14koa ezarriz. Amaieran Iturriagak arazo fisikoak izan zituen eskuin hankako giharretan, eta horrek baldintzatu egin zuen bere errendimendua. Oskoz eta Agirre bikoteak partidu borobila eginez erritmoa mantendu eta tanto erabakigarriak eskuratu zituzten. Azkenean, 22-15eko garaipenarekin jantzi zuten txapela.
Promozio mailan Insausti eta Bertiz txapeldun
Final nagusiaren aurretik, Promozio mailako finala jokatu zen, eta Olatz Insaustik eta Nahia Bertiz sunbildarrak ostutako bikoteak ez zuen zalantzarako tarterik utzi. 22-7ko emaitzarekin gailendu ziren Marta Gomez eta Alize Sagardui goizuetarraren aurka. Bikote urdinak hasieratik izan zen oso nagusi. Final handi baten urduritasunak erabat lotu zuen bikote gorria eta ez zuten txapelketa guztian erakutsi duten mailarik ematerik izan.
Omenaldi hunkigarria
Finalaren amaieran, omenaldi hunkigarria egin zitzaion Naroa Elizalde Etxekoloneari, bere ibilbide oparo eta eredugarriagatik emakumezkoen pilotan. Labriteko giroak une gogoangarriak utzi zituen zaleen eta pilotarien bihotzetan, 27 urte zituela otsailean hil zen pilotari zubietarra gogoan: Zubietako kuadrillako joaldunak, Ados Pilota eskolako haurren eta pilotarien lore eskaintza, Aurreskua, Aitor Sarriegi eta Uxue Fernandezen bertsoak, dantzak…
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!