'Eta eskualdeko gizonek zer?' dinamika aitzinera ateratzeko, Eraikiz, gizonak berdintasunerako bidean elkartearen dinamizazioa izanen dute. Eskualde bakoitzean bi motatako topaketak antolatu dituzte: hitzaldi irekiak herritar denentzako eta gizonentzako* bilerak.
Herritar denentzako antolatutako hitzaldietan Nafarroan gizonekin* garatutako esperientziak ezagutaraziko dituzte, gizonek* berdintasunaren sustapenean eta eskualdeko udalerrietan indarkeria matxistak ezabatzean paper aktiboa izan dezaten jendarte berdinzaleago baterantz. Saio horiek apirilaren 4a Beran eta 11n Elizondon eginen dituzte. Beran Beralandetan elkartuko dira 18:00etan eta Elizondon Arizkunenean 17:30ean.
Ekimenaren barrenean, bigarren dinamika gizonentzako* bilerak izanen dira. Bilera horiek berdintasunaren sustapenean lan egiteko nola antolatu aztertu nahi duten gizonei* zuzenduak izanen dira. Berdintasunaren sustapenean gizon* gazte eta helduekin nola lan egin aztertu nahi dute. Elkarrizketarako gunea izanen da, eta bertan erabaki ahal izanen dute nola konprometitu: modu autonomoan ala laguntza profesionalarekin? Aldizkako tailer edo topaketen bidez? Nola eta zer gai heldu nahi ditugu? Zertan zentratu nahi dugu? Zein ikuspegietatik? Bilera hauek maiatzaren 10ean Beran Beralandetan eta 17an Elizondo Arizkunenean eginen dituzte. Bi kasuetan 10:00etan hasi eta 12:30ak arte elkartuko dira.
Berdintasun Zerbitzuetatik nabarmendu dutenez, «Xareta, Baztan, Bertizarana, Malerreka eta Bortzirietako gizon* guziak animatu nahi ditugu prozesu honetan parte hartzera eta gizarte berdinzaleago baterantz doan eraldaketa feministan modu aktiboan eta kolektiboan inplikatuz».
Herritar denentzako hitzaldietan parte hartzeko ez da aitzinetik izenik eman beharko. Gizonentzako* tailerretan parte hartzeko aldiz, Beran apuntatu nahi dutenek berdintasuna@bortziriakberd.eus helbidera idatzi edo 722 69 30 78 zenbakira deitzen ahal dute. Baztanen parte hartu nahi dutenek, aldiz, berdintasuna@baztan.eus helbidera idatzi edo 613 00 36 34 telefono zenbakira deitu.