Ados Pilota elkarteak antolatutako binakako txapelketetako finalak jokatuko dituzte martxoaren 29an, larunbatean 17:30ean hasita Iruñeko Labrit pilotalekuan. Finaleko jaialdian, txapelketa osoan bezala, otsailean hil zen Naroa Elizalde Etxekolonea pilotari zubietarra izanen dute gogoan. Finalerako sarrerak 10 eurotan salgai daude adospilota.eus webgunean.
Promozio Mailako finala jokatuko dute lehenbizi. Horretan, Marta Gomezek eta Alize Sagardui goizuetarrak Olatz Insausti eta Nahia Bertiz sunbildarra izanen dituzte aurkari. Lau pilotari horietatik hiruk lehen aldiz parte hartu dute Adosen binakakoan: Gomezek, Sagarduik eta Insaustik. Bertizek, ordea, iaz txapeldun izan zen maila horretan, Aizane Ibarrolarekin batera.
Partida hori bukatu eta gero hasiko da Lehen Mailako finala. Iera Agirre Iturriaga leitzarrak eta Ane Mendiburuk Leire Oskozen eta Naroa Agirreren aurka jokatuko dute. Bi bikote horiek asteburuan sailkatu dira. Oskozek eta Agirrek gogotik egin behar izan zuten lan Maddi Barrokali eta Amaia Arrastiari irabazteko, larunbatean, Donostiako Atano III.a pilotalekuan: 22-17 nagusitu ziren. Iturriagak eta Mendiburuk, ordea, nagusitasun handiz hartu zituzten mendean Ainhoa Ruiz de Infante eta Oihana Orbegozo igandean, Miarritzeko (Lapurdi) Plaza Berri frontoian: 22-3 irabazi zuten.