Lehen fasea bukatu ondotik, Ados pilota elkarteak antolatutako eskuz binakako txapelketa finalerdietara ailegatu da. Asteburuan jokatuko dira promozio nahiz lehen mailako finalerdiak, larunbat arratsaldean Donostiako Atano III.a pilotalekuan eta igande goizean Miarritzeko Plaza Berrin eta denetan izanen dira eskualdeko pilotariak. Promozio mailan, Sunbillako Nahia Bertiz eta Iraide Iriarte eta Goizuetako Alize Sagardui ariko dira eta lehen mailakoan, Iturriaga leitzarra.
Martxoaren 22an, larunbatean 17:30etik aurrera Donostiako Atano pilotalekuan jokatuko dituzte lehen finalerdiak. Promozio mailan, Crespo eta Perez, Insaustiren eta Nahia Bertiz sunbildarraren kontra ariko dira. Lehen mailako lehen finalerdian, berriz, Barrokal eta Arrastia, Oskozen eta Agirreren kontra ariko dira.
Martxoaren 23an, igandean 11:30ean hasita, Miarritzeko Plaza Berrin jokatuko dira bertze bi finalerdiak. Promozio mailan, Gomez eta Alize Sagardui goizuetarra, Iraide Iriarte sunbildarraren eta Sotilen kontra ariko dira. Lehen mailako finalerdian, berriz, Ruiz de Infante eta Orbegozo, Iturriaga leitzarraren eta Mendibururen kontra ariko dira.
Finalerdietarako eta finalerako sarrerak eskuragarri daude adospilota.eus web gunean.