Joxean Etxeberria nagusitu zaio Basozabali Doneztebeko aizkora apustuan

Ttipi-Ttapa 2025ko mar. 10a, 12:30

Joxean Etxeberria zigatarra kontent larunbatean jendez gainezka zegoen Doneztebeko Ezkurra pilotalekuan apustua irabazi ondotik. Argazkia: Ondikol

Mila lagun baino gehiago bildu ziren larunbatean Doneztebeko Ezkurra pilotalekuan eta Zigakoaren garaipena ikusi zuten

Aizkora apustu eguna ere izan zen martxoaren 8a Donezteben. Ikusmina piztu zuen Joxean Etxeberria zigatarraren eta Jokin Urretabizkaia Basozabal aizkolarien arteko desafioak eta mila lagunek baino gehiagok bete zuten Ezkurra pilotalekua. 8.000 euro zituzten jokoan, 4.000 euro bakoitzak, eta Zigakoak eramandako hamabina kanaerdiko eta donostiarrak aurkeztutako 60 ontzako seina enbor moztu behar zituzten  larunbatean Doneztebeko Ezkurra pilotalekuan. Lehen enborretan aitzinetik izan zen donostiarra, baina Etxeberria gailentzen joan zen poliki-poliki. Ordubete, 9 minutu eta 26 segundo behar izan zituen Zigakoak lana burutzeko, donostiarrak baino bortz minutu guttiago.

Apustuak sortutako ikusminaren erakusgarri, Doneztebeko Ezkurra pilotalekura hurbildutako zaleen artean zeuden aizkora eta herri kirol munduko aurpegi ezagunak: Mindegia, Olasagasti, Izeta, Perurena, Arrospide, Otaño, Larretxea, Saralegi, Astibia, Etxebeste eta gaur egungo txapelduna, Iker Vicente, bertzeak bertze.

 

Etxeberria: «Materialean egon da giltza»

Joxean Etxeberriaren erranetan, «ekarritako materialean» egon zen garaipenaren giltza: «Jokinek [Basozabalek] nik baino kolpe indartsuagoa du, joan den urte guztian ez nion inoiz irabazi, egur bigunarekin ni baino gehiago da. Ofizioagatik irabazi diot, bera ni baino gazteagoa da eta esperientzia hori baliatu dut. Eskerrak eman nahi dizkiot frontoia bete eta animoak eman dituen afizioari ere».

 

Basozabal: «Horrelako esperientziak ez ditugu egunero bizitzen»

Galdu arren, esperientziarekin gustura zegoen Basozabal ere: «Esperientzia polita izan da, horrelakoak ez ditugu egunero bizitzen. Irabazi izan banu hobea izanen litzateke, baina batzuk inoiz ez dute biziko horrelako esperientziarik. Egindako lanarekin ere gustura gelditu naiz. Nik aspaldian ez nuen halako plazarik ikusi, aulki guztiak beteak, jendea zutik… Eskerrak eman etorri den jende guztiari, sufritu egin dut, baina baita gozatu ere».

Joxean Etxeberria Zigako aizkolariak bota zuen desafioa, gaur egungo edozein aizkolariri, Iker Vicenteri, Mikel Larrañagari, Julen Alberdiri, Eneko Otañori edo Hodei Ezpeletari izan ezik. Tolosako Kantabriko Ostatuko hitzordura agertu zen Jokin Urretabizkaia Basozabal donostiarra, apustua onartzeko prest.

 

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun