Sunbillako txirrindulariak lehia estua izan zuen Saltoki Conor taleko Iñigo Sagardoy eta Dario Silvestre txirrindulariekin. Lehenbiziko itzulietan, Katea Bikeko Koldo Herrera sunbildarra ere hirukote horrekin ibili zen, baina azkenera gibelera gelditu zen. Azken sprintean, Eneit Bertiz nagusitu zen (1.21.34), Sagardoyren (1.21.35) eta Silvestren aitzinetik (1.21.37). Azkenean, Koldo Herrera sunbildarra laugarren izan zen proban eta bigarren, 23 urtez beheitiko sailkapenean, Bertizen gibeletik. 23 urtez beheitiko kategoria honetan hirugarren izan zen Saltoki Conor taldeko Jon Egizabal leitzarra. Joan den urtean Rural Kutxa Kopa irabazi eta aurten Katea Bike taldean ari den Mikel Merinok seigarren postua eskuratu zuen elite mailan.
Junior mailan ere ederki ibili ziren eskualdeko txirrindulariak Caparroso proban. Saltoki Conor taldeko Oihan Aleman iruritarra izan zen bizkorrena (56.07) eta Gazteluko Mikel Telletxea taldekidea bigarren (57.26). Kadete mailan, azkenik, Aurrera BTT taldeko Aratz Gurrutxaga aresoarra hirugarren izan zen.
Bortz proba
Caparroson igandean jokatuko den lehen lasterketaren ondotik, XV. Nafarroako Rural Kutxa Kopak bertze lau proba izanen ditu: Oibarren martxoaren 30ean, Antzinen apirilaren 27an, Jaurrietan maiatzaren 25ean eta Zangozan ekainaren 15ean. Beraz, lehen aldiz, aurten txapelduna uda hasi baino lehen jakinen da, ez baita irailean probarik izanen.