Urtero, Ingurumen Departamentuko eta GAN sozietate publikoko teknikariek eta zaintzarako langileek urtarrilean hasten dituzte Nafarroako pinudietako prozesionariaren infestazioa ebaluatzeko lanak, eta, horri esker, kalkula daiteke zenbateko kaltea izanen den. Aurten, aurreko urteekin alderatuta, gorakada nabarmena izan da, batez ere Iruñerritik eta Erdialdetik hurbilen dagoen ingurunean. Teknikariek azaldu dutenez, prozesionaria mailetako gorabehera horiek ziklikoak dira, eta gertaera meteorologiko kaltegarriekin eta horien eta haien etsai naturalen arteko orekarekin lotzen dira. Igoera hori espero zitekeenaren barruan sartzen da.
Oro har, pinuaren prozesionariak ez du arriskuan jartzen erasandako pinudien egonkortasuna, azikulak galtzeak murriztu egiten baitu fotosintesi-ahalmena, baina ez dute heriotza eragiten, udaberrian kimuak garatzea ahalbidetzen duten gorringoei eragiten ez dietelako. Milaka urtez beldarra eta pinuak elkarrekin bizi ondotik garatutako biziraupen-estrategian, kaltea azikula zaharretara mugatzen du eta zuhaitzak modu naturalean berreskuratzeko gai izanen dira denbora baten ondotik.
Pertsona eta maskotendako oinarrizko aholkuak
Prozesionariko beldarrek ile urtikatzaileak dituzte, eta, ukituz gero, hainbat erreakzio alergiko eragin ditzakete. Erreakzio horien larritasuna pertsona bakoitzaren sentikortasunaren araberakoa da, larruazaleko afekzio arinetatik hasi eta arnasketa azaroetaraino. Hori zuhaitzak jaisteko prozesuan gertatzen da, beldarrak lurperatu aurretik. Erreakzio alergikoak saihesteko egin behar dena ez ukitzea da, ezta gehiegi hurbiltzea ere.
Bizikletan ibiliz gero, lepoa, besoa eta hankak estaltzen dituen arropa erabiltzea gomendatzen da. Maskotetan eragindako afekzioek, kasurik larrienetan, nekrosiaren hanturak eta/edo animalia itotzea dakarte, zenbait ale irensten badituzte. Horregatik, lotuta eramatea da babesteko modurik onena.