Ikasturte honetan dagoeneko hiru greba egun egin dituzte irakasleek, eta Steilas, LAB, CCOO eta ELA sindikatuek gaurko prentsaurrekoan adierazi dutenez, «milaka irakaslek nekea eta haserrea» adierazi dituzte. Hezkuntza Departamentuak, ordea, «negoziatzeko benetako asmorik gabe» segitzen du sindikatuen hitzetan: «Hainbertze aldiz eskatu ditugun aldarrikapenak baztertu dituzte eta inbertsio ekonomikoa lortzeko asmo gutti erakusten segitzen dute».
Hala, «Hezkuntza Departamentuaren jarrera itxia» ikusita, Hezkuntza publikoaren alde lelopean, mobilizazio gehiago iragarri dituzte ondoko zazpi asteetan. «Nafarroako eskualde guzietara» hurbildu nahi dute, eta otsailaren 19tik apirilaren 9ra, asteazkenero lanuzteak egiteko deia egin dute, 09:00etatik 11:00etara. Argitu dutenez, «lanuzte horietan asanbladak eta elkarretaratzek eginen ditugu. Horrela, mobilizatzen eta gure haserrean adierazten segitzeaz gain, sindikatuok lehenbiziko eskutik izanen dugu irakasleen beharrak eta proposamenak aditzeko aukera».
Horrekin batera, oroitarazi dute «edozeinek asteazkenero lanuztea egiteko aukera» izanen duela, baina eurek egutegi bat proposatu dute, lanuzteak zazpi eskualdetan banatuta egiteko:
- Otsailaren 19an Baztan-Bidasoan
- Otsailaren 26an Lizarraldean
- Martxoaren 12an Sakana-Larraun-Leitzaldean
- Martxoaren 19an Zangoza aldean eta Pirinioetan
- Martxoaren 26an Erriberan
- Apirilaren 2an Tafalla aldean
- Apirilaren 9an Iruñerrian
Astero zabalduko dute eskualde bakoitzeko proposamena, asanblada eta elkarretaratzeko puntuak eta hurbiltzera deitutako ikastetxeen zerrenda.