Abenduaren 21ean hasiko da Olaberrian Ados Pilota Elkartearen Binakako Txapelketa, urteko lehiaketarik luze eta gogorrena. 2025eko martxoaren 29an (gizonezkoena baina egun bat lehenago) bukatuko da Labrit pilotaleku ederrean Euskal Herritik barrena 46 partidu jokatu ondotik. Lehen mailan Iturriaga leitzarra izanen da eskualdeko pilotari bakarra, baina promozio mailan, Iraide Iriarte eta Nahia Bertiz sunbildarrak eta Alize Sagardui goizuetarra ariko dira.
Egutegia eta egoitzak
Txapelketa 25 herritan jokatuko da, besteak beste: Olaberria, Sopuerta, Sunbilla, Bera, Zestoa, Lekunberri, Irurtzun, Azpeitia, Antzuola, Arroniz, Otxandio, Azkoitia, Lizarra, Mallabia, Segura, Aoiz, Tolosa, Zumarraga, Altsasu, Aizarnazabal, Getaria, Lekeitio, Beasain, Donostia eta Biarritz.
Finalak Iruñeko Labrit pilotalekuan jokatuko dituzte 2025eko martxoaren 29an.
Parte hartuko duten bikoteak
Txapelketak bi maila izanen ditu: Promozioa eta Lehen Maila, eta honako bikote hauek parte hartuko dute:
Lehen Maila:
- Barrokal-Arrastia
- Oskoz-Agirre
- Ruiz de Infante-Orbegozo
- Arrieta-L. Galeano
- Iturriaga-Mendiburu
- Aranburu-Mujika
Promozio Maila:
- Iriarte-Sotil
- Insausti-Bertiz
- Lamadrid-Perez
- Gomez-Sagardui
Antolatzaileek pilotari gazteen aldeko apustua egin dute. Promozio mailan, zortzi pilotarietatik bortz berriak izanen dira eta lehen mailan ere hiru debutari. Honez gain aipamen berezia izan dute beste behin Naroa Elizalde Otxekolonea zubietarrarentzat. Txapelketaren irudia berea izango da eta keinu honekin babes nahiz animoak eskaini nahi izan dizkiote.
Berritasunen artean pilota berriak izango dituztela ere zehaztu dute. Horretarako Zulaika pilotagilearekin lanean jardun dute jokoari bizitasun gehiago eman asmotan.
Txapelketaren formatua
Promozio mailan, ligako lehen bi bikoteak zuzenean sailkatuko dira final handira.
Lehen Mailan, ligako lau bikote onenek finalerdiak jokatuko dituzte (lehenbizikoa laugarrenaren kontra eta bigarrena, hirugarrenaren kontra). Finalerdi hauen irabazleak azken txapelaren bila lehiatuko dira final handian.
Txapelketaren jarraipena egiteko, pilota partidu guztiak zuzenean Adoseko Youtubeko kanalean ikusteko aukera egonen da eta Hamaika telebistak ere jarraipen berezia eginen du: astelehenetan Joko Zelaia saioan partidak eskainiz eta zuzenean finalerdi nahiz final handiak eskainiz. Honez gain, Izarkomekin egindako lankidetzari esker, aurkeztu berri duten Begizta plataforman Ados Pilotak bere katea izanen du.
Beraz osagai guztiak dauzka aurtengo txapelketak ere iaz bezain arrakastatsua izateko.