Aldi honetan, 53 lagun apuntatu dira –zazpi bidelagunak–, eta astean behin, giro goxoan, euskaraz aritzeko biltzen dira, talde berean euskaraz aise moldatzen direnak –bidelagunak– eta euskara hobetu nahi dutenak – bidelariak–. Euskaltzaleen Topagunea dago dinamikaren gibelean eta debalde da.
Bortzirietan, Beran bi talde eta Lesakan talde bat elkartzen dira; Malerrekan, Iturenen talde bat eta bertze bat Donezteben. Horiez gain, asteroko maiztasunik gabe, bertze talde bat ekintza osagarrietan parte hartzeko biltzen da. Baztanen, berriz, hiru talde osatu dituzte.
Hiztegia aberastera batzuk, hitz jarioa hobetzera bertze batzuk, beldurra eta lotsa galtzera... Solaslaguna egitasmoaren helburua argia da: euskaraz aritzeko eremuak saretzea, euskaraz solastatzeko aukerak emanez eta euskarazko harremanak sortuz. Honela gaineratu du Mertxe Gerriko Solaslaguneko dinamizatzaileak: «Erabileran aurrerapausoa ematea beharrezkoa den garai honetan, ezagutzaren eta erabileraren arteko zubi lana egiteaz gain, Solaslagunak hiztun berriak sortzen laguntzen du».
Interesa dutenek izena telefonoz (610 92 06 73) edo e-mailez (solaslaguna@topagunea.eus) ematen ahal dute.
«Mintzapraktika taldeetan parte hartzeak alde positibo aunitz ditu»Begoña Elejabarrieta, Gartzaingo bidelaguna Bere garaian bertzeengandik hartu zuena, bueltatzen ari da gaur egun Begoña Elejabarrieta solaslagunen taldean. Bidelaguna da, baina kontatu duenez, «bidelagunekin ikasi nuen euskaraz, eta holako talde batean solas egiteko aukera eskaini zidaten, erraztasuna lortzeko. Hizkuntza gauza bizia da eta ez baduzu praktikatzen ez duzu aitzinera egiten». Hala, Durango (Bizkaia) utzita, duela urtebete Baztanera bizitzera etorri zenean, bertako solaslagun taldean parte hartzeko aurkeztu zuen bere burua. Egitasmoari «ekarpen polita» egiten diolakoan dago, eta agerian utzi du «kontent» dabilela: «Ematen duzunean, nik uste, beti hartzen duzula». Kontatu duenez, «hasieran liburutegian edo kultur etxean elkartuko ginela pentsatzen nuen, baina taldekideek ostatu batean kafe bat hartuz elkartuko ginela erran zidaten. Giroa sortzeko ideia polita izan zen». Bertzeak bertze, «jendea ezagutzeko» aukera eman dio, eta «mintzapraktika taldeetan elkartu eta solasean aritzeak alde positibo aunitz» dituela gaineratu du. |
|
«Egunero euskaraz aritzen saiatzen naiz»Jakes Xanti Maillard, Amaiurko solaslaguna Jakes Xanti Maillardek zazpi urte daramatza Baztanen bizitzen, eta «AEKri eta Elizondoko eta Doneztebeko solaslagunen taldeei esker, euskara ikasteko erronkari aurre egiten» ari da. «Egunero» saiatzen omen da euskaraz mintzatzen, baina oraindik ere bere euskara mailarekin «lotsatzen» dela onartu du: «Orokorrean entenditzen dut jendeak erraten duena, baina ez naiz ausartzen parte hartzen». Baina lagunartean bai: «Aukera baldin badut lagunekin euskaraz mintzatzen saiatzen naiz». |
|
«Euskara maila hobetzen lagundu dit»Andrew Smith, Zubietako solaslaguna Andrew Smithek bost urte daramatza Solaslaguna ekimenean parte hartzen. «Inguru informalean euskara aditzeko eta euskaraz solas egiteko» apuntatu zen, eta «neurri ttiki batean» euskara maila hobetzen lagundu diola kontatu du. «Jende interesgarriarekin solastatu bidenabar garagardo bat hartzeko» aukera izatea da Solaslagunatik «gehien» gustatzen zaiona. Bere irudiko, «sistema ona da, ingelesez esaten dugun bezala, 'The more, the merrier'. [Zenbat eta gehiago, orduan eta hobeki]» |
|
|
|
|
|
|
«Euskara biziago sentitzen dut»Izaskun Juanena, Doneztebeko solaslaguna «Mingaina libratzeko gogoa» zuelako hasi zen Izaskun Juanena Solaslagunean parte hartzen duela hiru urte. Batetik, «C1 atera ondotik, praktikatzen ez banuen hantxe gelditzen zela» ikusten zuelako, eta bertzetik, «ikasitako euskaran ari baino nahiago nuelako bertako euskaran solastatu». Kontent da eta «lagundu» diola dio; «biziago sentitzen dut euskara». Aldi berean, «hemengo hiztegia ikasteaz aparte, astero lagunekin elkartzeko» aukera ematen dio Solaslagunak. |
«Solaslagunak lotsa galtzen lagundu dit»Iñaki Castillo, Berako solaslaguna Jokin lagunak proposatuta animatu zen Iñaki Castillo Solaslagunean parte hartzera: «Aita kanpotarra zen eta etxean erdaraz egiten genuen. Eskolan eta institutuan ere erdaraz egiten genuen, eta lagunekin hasi nintzen euskaraz». Ez da damutu hartutako bidearekin, hamahiru urte pasatu baitira Solaslagunean hasi zenetik. «Lotsa galtzen lagundu» omen dio, eta gainera, «taldean ongi pasatzen dugu, lagunartean sentitzen gara». Jendeari parte hartzeko gomendatu dio. |
«Ikasi nahi dutenekin egotea atsegin dut»Julia Anton, Berako solaslaguna Julia Antonek hiru ikasturte daramatza Solaslagunean parte hartzen. Aitortu duenez, «aunitz gustatzen zait denetarik ikastea» eta horixe izan zen apuntatzeko arrazoia. Euskara maila hobetzen eta jarioa lortzen lagundu diola kontatu du, baina onartu du, hortik aparte, «gramatika behar dudala». Gainerakoan, «ikasteko helburu bera duten pertsonekin egotea atsegin» duela gaineratu du eta parte hartzeko gonbita egin du: «Hagitz ongi pasatuko lukete». |