Hasierako ligaxka akitu ondotik, asteburu honetan abiatu dira Nafarroako XIX. erremonte txapelketako finalerdiak. Zehazki, irailaren 7an, larunbat arratsaldean Garesko Zamariain pilotalekuan jokatu zen finalerdietako joaneko partidan, Xanti Uterga doneztebarrak eta Agirrezabalak 35-17 irabazi zieten Jon Sagaseta iruritarrari eta Otanori. Beraz, hanka eta erdi finalean dute Utergak eta Agirrezabalak, Ribaforadan irailaren 28an jokatuko den itzulerako partidarako 18 tantoko aldea baitute.
Hasiera berdinduaren ondotik, gorriak erraz nagusitu ziren. Uterga izan zen onena, 17 tanto eginez.
Jaialdiko lehen partidan ere ez zen berdintasun handirik izan eta Matxin III.ak eta David Mitxeo doneztebarrak 30-18 irabazi zieten Zeberio II.ari eta Markel Leatxe donamariarrari.