Nafarroako XIX. erremonte txapelketako bosgarren jardunaldia jokatu dute larunbatean Milagron. Bi bikoteak finalerdietarako sailkatuak zeuden, baina beraien multzoko buru izatea zuten jokoan. Eloy Otxandorena doneztebarrak eta Ionek 35-23 irabazi zieten Jon Sagaseta iruritarrari eta Otanori. Otxandorena izan zen partidako onena, hamasei tanto egin baitzituen.
Milagroko jaialdiko lehen partidan oiztarrak gailendu ziren, Mikel Mikelarenak eta Aimar Saldiasek 30-25 irabazi baitzieten Matxin III.ari eta Markel Leatxe donamariarrari.
Ligaxkako azkena irailaren 1ean Artaxoan
Nafarroako erremonte txapelketako ligaxkako azken partida irailaren 1ean, igandean Artaxoan jokatuko da. Hemen ere multzoko lidergoa jokoan izanen dute Xanti Uterga doneztebarrak eta Agirrezabalak, Xuban Iturregi iruritarraren eta Aimar Saldias oiztarraren kontra. Partida honen irabazleak Sagaseta eta Otano izanen ditu arerio finalerdietan eta galtzaileak, Otxandorena eta Ion.