70 euro arteko karguak ibilbide bakoitzarengatik
Arazo horregatik haserre, ehunka herritar joan dira hilabeteotan Irache Kontsumitzaileen Elkartera. Kasu gehienetan gertatu dena da bidaiariak poltsa ttiki bat edo maleta bat zeramala hegazkinaren kabinan eramateko. Hegaldiaren egunean, maleta kabinan eramateagatik kobratu diote, edo fakturatzera eta horren tasa ordaintzera behartu diote bidaiariari. Kostua aldatzen da konpainiaren, pisuaren eta hegaldiaren arabera, baina Irachek salatu duenez, 8 eta 70 euro artekoa izan daiteke kobratutakoa ibilbide bakoitzarengatik.
Eskuko ekipajea eramatea kontsumitzaileen eskubidea da
Aireko Nabigazio Legearen arabera, konpainiak «doan» garraiatu behar ditu kabinan, eskuko ekipaje gisa, «bidaiariak eramaten dituen objektuak eta fardelak», baita aireportuko dendetan egindako erosketak ere. «Segurtasun arrazoiengatik bakarrik ukatu ahal izanen da eskubide hori, objektuaren pisuarekin edo tamainarekin lotuta».
Joan den udazkenean, eurodiputatuek Europako Batzordeari eskatu zioten berma zezala EBko Justizia Auzitegiak 2014an emandako epai bat, konpainiek eskuko ekipajeagatik ezin zutela gehigarririk kobratu ebazten zuena, betiere «pisuari eta neurriei dagokienez arrazoizko baldintzak, eta aplikatu beharreko segurtasun baldintzak betez gero».