Adosen III. San Fermin torneoko bi jardunaldi jokatu dituzte asteburuan, larunbatean Erratzun eta igandean Eulaten. Oraindik bi jardunaldi falta badira ere (uztailaren 5ean Iruñean eta uztailaren 9an Lesakan), erabakigarriak suertatu dira, irabazleek uztailaren 12an Labriten jokatuko den finalerako txartela eskuratu baitute.
Larunbatean Erratzun, Oskozek eta Galeanok 22-17 irabazi zieten Aldaregiari eta Mujikari eta, honenbertzez, jokatu dituzten bi partidak irabazita, finalerako txartela eskuratu zuten gorriek.
Igandean Eulaten bertze horrenbertze egin zuten Iturriaga leitzarrak eta Zabalak, 22-13 irabazi baitzieten Aranbururi eta Ruiz de Larramendiri.
Uztailaren 5ean Iruñean eta uztailaren 9an Lesakan
Honela, uztailaren 5ean Iruñean eta 9an Lesakan jokatuko dituzten binakako partidek ez dute eraginik izanen sailkapenean. Halere, lau eta erdiaren barreneko txapelketako finalerdiak ere jokatuko dituzte jaialdi horietan. Iruñean, Goiuri Zabaleta leitzarra, Ibarrolaren kontra ariko da eta Lesakan, Barrokal eta Ruiz de Infante izanen dira aurrez aurre.
Binakako nahiz lau eta erdiaren barreneko final handiak Iruñeko Labriten jokatuko dituzte uztailaren 12an, 11:30ean hasiko den jaialdian.