Lurretik Ikasiz proiektuko lantaldeak ohar bidez jakinarazi duenez, «20 bisita inguru eskaini ditugu eta 400 ikasle eta irakasle baino gehiagok eskualdean dauden ekoizpen proiektuak bertatik bertara ezagutzeko aukera izan dute. Guk arras gustura hartu ditugu, gure lanaren nondik norakoak partekatzeko tarte polit bat izan dugu eta».
Ikasturte honetan lehenbiziko aldiz paratu dute martxan proiektua, eta heldu den ikasturtean emanen diote segida: «Berriz ere gogotsu helduko diogu ekimenari, elikadura iraunkor baten inguruko lanketa mantso-mantso ohitura bihurtuko den esperantzaz». Horrekin batera, «elikadura iraunkor baten inguruko sentsibilizazioa egitearen ardura herritar guztioi dagokigula» gaineratu dute.