Udaberriko Bertso pilota txapelketa berezia bukatu orduko, Adosen San Fermin torneoa abiatu da asteburu honetan. Jardunaldi bikoitza izan da. Larunbatean Cortesen jokatutako partidan Oskozen eta Galeanok 22-15 irabazi zieten Etxebeste beratarrari eta Mendibururi. Gorriak aitzinetik ibili ziren hasiera, baina azkeneak urdinak gailendu ziren. Igandean Ubiden jokatutako partidan Iturriaga leitzarrak eta Zabalak 22-17 irabazi zieten Arrietari eta Orbegozori. Hemen ere markagailua irauli zuten irabazleek. Izan ere, urdinak aurretik ibili ziren hasieran, baina azken txanpan, partida berdintzea ez ezik, irabaztea lortu zuten gorriek.
Ekainaren 29an Erratzun eta uztailaren 9an Lesakan
Txapelketa honetako hirugarren jardunaldia Erratzun jokatuko dute ekainaren 29an. Etxekolonea zubietarrak eta Galeano, Etxebeste beratarraren eta Mendibururen kontra jokatuko dute. Ekainaren 30ean Eulaten jokatuko dute Aranburuk eta Ruiz de Larramendik, Arrietaren eta Orbegozoren kontra.
Uztailaren 5ean Iruñean jokatuko dute Etxekolonea zubietarrak eta Galeanok, Aldaregiaren eta Mujikaren kontra. Lau eta erdiaren barreneko buruz buruko txapelketa ere jokatuko dute San Fermin Torneoan eta Iruñean jokatuko dute lehen finalerdia Goiuri Zabaleta leitzarrak eta Ibarrolak.
Uztailaren 9an Lesakan jokatuko den azken jardunaldian erabakiko dira finalistak. Binakako partidan Iturriaga leitzarra eta Zabala, Aranbururen eta Ruiz de Larramendiren kontra ariko dira eta lau eta erdiaren barrenean, Barrokal eta Ruiz de Infante izanen dira aurrez aurre.
Binakako nahiz lau eta erdiaren barreneko final handiak Iruñeko Labriten jokatuko dituzte uztailaren 12an, 11:30ean hasiko den jaialdian.