Lehenbiziko finalerdian Josetxo Ezkurra doneztebarra izan zen onena, Azpirozek ongi lagunduta. Denera 13 tanto egin zituen Ezkurra II.ak. Aimar Jabalerak ere maila ona eman zuen (hamaika tanto egin zituen), baina Barrenetxeak ez zuen sakearekin asmatu (tanto bakarra egin zuen eta bi falta).
Bigarren finalerdia berdinduagoa izan zen eta, berezia baldin bada ere, galtzaileek irabazleek baino tanto gehiago egin zituzten (33-30), baina ez ziren finalera pasatu. Lehenbiziko jokoa berdindua izan zen, baina azkenean Urrizaren eta Martirenaren alde erori zen (13-15); bigarrenean Ansa II.a eta Zubiri erraz gailendu ziren (15-7) eta kitarakoan ikusi ziren tantorik ederrenak. Berdinduak ibili ziren baina 3-4tik 4-7ra joan ziren Urriza eta Martirena eta 5-8 irabazi zuten azkenean. Aritz Zubiri goizuetarrak partida ona jokatu zuen, baina ez zen nahikoa izan finalera ailegatzeko.
Finalerdien ondotik, finalerako pilotak aukeratu zituzten
Bi finalerdiak bukatu orduko, ekainaren 24an, astelehenean jokatuko den finalerako pilotak bereizi zituzten finalistek. Ezkurra II.ak eta Azpirozek pilota biziagoak aukeratu zituzten eta Urrizak eta Martirenak lehorragoak.