Udaberriko erremonte txapelketako lehen bikote finalista ortziralean erabakiko da Azkoienen

Ttipi-Ttapa 2024ko ekainaren 20a

Aimar Saldias oiztarra pilota zail bat modu akrobatikoan altxatzen. 50 urte beteak dituen Patxi Zeberiorekin batera orain arteko partida guztiak nagusitasunez irabazi ditu.

Zeberio II.a eta Saldias, Mikelarena eta Mitxeoren kontra ariko dira eta irabazleak ekainaren 28an Donezteben jokatuko den finalerako txartela izanen du eta galtzaileak finalerdia jokatu beharko du igandean Uterga eta Agirrezabalaren kontra

Euskal Jai erremonte fundazioak antolatutako udaberriko erremonte txapelketako hamargarren jardunaldi erabakigarria uztailaren 21ean, ortziralean 19:00etan hasita jokatuko da Azkoiengo Vicente Lacalle pilotalekuan. Sailkapenaren buruan berdinduak dauden bi bikoteak ariko dira eta, beraz, irabazleak ekainaren 28an Donezteben jokatuko den finalerako txartela lortuko du. Galtzaileak, berriz, finalerdia jokatu beharko du Uterga eta Barricarten ordez jokatuko duen Agirrezabalaren kontra ekainaren 23an Burlatan.

Azkoiengo norgehiagokan, beraz, Zeberio II.a eta Aimar Saldias oiztarra, Mikel Mikelarena oiztarraren eta David Mitxeo doneztebarraren kontra. Kontuak errazak dira: irabazten duenak finala jokatuko du eta galtzen duenak finalerdia. Dagoeneko 50 urte beteak dituen Patxi Zeberiok eta Aimar Saldias oiztarrak orain arteko partida guztiak nagusitasunez irabazi dituzte eta beraiek izanen dira faborito, Mikelarena eta Mitxeo gazteen kontra. Baina hauek ere ongi ari dira.

Jaialdiko lehen partidan, Jon Sagaseta iruritarra eta Agirrezabala, Xuban Iturregi iruritarraren eta Markel Leatxe donamariatarraren kontra ariko dira. Ohi bezala, Azkoiengo jaialdia ere ADANO elkartearen alde izanen da.

Kirola Baztan Malerreka Irurita Donamaria Doneztebe Oiz

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun