Alberto Lakosta zenaren omenez, XIX. Etxauriko Harriak harri-jasotze jaialdia egin dute ekainaren 16an Etxaurin, Etxauriko udalak eta Lurgorria kultur elkarteak antolatua. Denera zortzi harri-jasotzaile aritu dira lehian, tartean Josetxo Urrutia leitzarra eta Estefania Etxebeste iturendarra.
136,5 kiloko Etxauriko Harriarekin saiatu dira lau gizonezko eta horien artean, Sergio Mielgo madrildarrak egin ditu altxaldi gehien: hamar. Imanol Royo Lartainek zortzi aldiz altxatu du eta Gari Garmendiak lau. Josetxo Urrutia leitzarra, aldiz, harria altxatu ezinik gelditu da. 68 kiloko Lurgorria harriarekin bigarren urtez aritu dira emakumeak. Karmele Gisasola bizkaitarrak 24 aldiz altxatu du, Sara Jimenez de Aberasturi arabarrak 22 aldiz, Estefania Etxebeste iturendarrak 19 aldiz eta Udane Ostolaza gipuzkoarrak 18 aldiz.