Nafarroako Kirol Jokoetako lehen mailako eskuz binakako pilota txapelketako hirugarren faseko finalak jokatu zituzten ekainaren 15ean, larunbat goizean Agoitzeko Toki Eder pilotalekuan. Eskualdeko zenbait pilotari ere bertan aritu ziren eta batzuk txapelarekin bueltatu ziren.
Erraterako, ttikienen kategorian, benjamin mailako final estuan, Umore Onako Oinatz Goizuetak eta Joan Olaizolak 2-1 irabazi zieten Abaxitabideako Amorenari eta Narvaezi (8-10, 10-4 eta 5-4).
Alebin mailan, Lesakako Arkupe elkarteko Jerai Bazterrika igantziarrak eta Oihan Muñoa lesakarrak 18-9 irabazi zieten Baztango Txarutako Muñoz eta Rekalderi.
Infantiletan, eskualdeko ordezkaririk gabe, Ultzamako Gurmindok eta Sarrateak 18-4 irabazi zieten Agoitzeko Garciari eta Nicuesari.
Kadete mailan, Atarrabiako Esain eta Santestebanek 22-19 irabazi zieten Leitzako Aurrerako Baleztenari eta Alkortari.
Jubeniletan, eskualdeko pilotaririk gabe, San Francisco Javier taldeko Zabaletak eta Garridok 22-6 irabazi zieten Oberenako Crespori eta Gelbentzuri.
Aipatzekoa da bigarren mailako finalak ere jokatu zituztela larunbatean Altsasun. Eskualdeko bikote bakarra ailegatu zen finalera eta txapela janztea lortu zuen gainera. Jubenil mailan, Aurrerako Arregik eta Garateak 22-16 irabazi zieten Erasoko Albizu eta Saenzi.