Hamasei pilotarik hartuko dute parte emakumezkoen III. San Fermin Torneoan. Ekainaren 22an hasiko da, hamasei pilotariren parte-hartzearekin. Bi dira aurtengo berrikuntza nagusiak. Alde batetik, lau eta erdiaren barreneko modalitatea ere sartu dute San Fermin txapelketan eta, bertzetik, finalak Sanferminetako festa betean jokatuko dituzte. Hain zuzen, uztailaren 12an, goizez, Iruñeko Labrit pilotalekuan.
Maider Beloki Unzu, Iruñeko udaleko Kultura, Jai, Hezkuntza eta Kirol zinegotziak eta Maite Ruiz de Larramendi Ados Pilotako lehendakariak aurkeztu dute aurtengo edizioa, eskuz banakako txapelketako finalerdietako kanporaketen zozketatu bertan eginez. Aurkezpenean parte hartu dute, halaber, Natalia Bellostas INTIAko zuzendari gerenteak, txapelketaren erakunde babeslea den aldetik, eta Raquel Anjol Iruñeko Peñen Federazioko presidenteak, eta Down Sindromearen Nafarroako Elkarteak.
Izan ere, aurreko edizioetan bezala, ekimen solidarioa izanen da aurtengoan Down sindromearen Nafarroako elkartearen alde Labriten uztailaren 5ean jokatuko den jaialdia. Dagoeneko sarrerak eskuragarri daude adospilota.eus atarian.