Ados pilota elkartearen Udaberri pilota txapelketa azken txanpan sartua da. Asteburu honetako jaialdia berezia izanen da, Yala Palestinaren aldeko Nafarroako elkartearen alde jokatuko baita, Palestinaren Alde Mugitu goiburupean. Ekainaren 2an, igande goizean Labriten jokatutako jaialdian lortutako dirua Palestinako erietxe bati laguntzeko izanen da. 10 euroko sarrera kobratuko da. Sarrerak hemen
Igandean 10:00etan hasita, jaialdi mistoa izanen da. Lehenik pala partidak jokatuko dituzte: Diego Andueza eta Alvaro Goñi, Xabi Legarra eta Edu Vidanen kontra. Ondotik, Adosen Udaberri pilota txapelketako jardunaldia jokatuko dute Bitxiloreak (Irati Zabala, Maddi Barrokal eta Irantzu Etxebeste beratarra, Aitor Sarriegi bertsolariarekin) eta Eguzkiloreak taldeek (Oihana Orbegozo, Naroa Agirre eta Andrea Aldaregia, Nerea Elustondo bertsolariarekin). Bertan erabakiko da ekainaren 8ko Azpeitiko finalean Mitxoletak taldearen arerio zein izanen den. Segidan, esku pilota partida jokatuko dute profesional ohiek: Mikel Olazabal aresoarra eta Peio Martinez de Eulate, Adur Lasa eta Iñigo Pascualen kontra.