Nafarroako Kirol Jokoetako nesken eskuz binakako pilota txapelketako hiru final jokatu zituzten maiatzaren 24an, ortziralean Lesakako udal pilotalekuan eta hiruetan aritu ziren eskualdeko pilotariak.
Alebin mailako finalean, Arkupe elkarteko Eneritz Muñoa lesakarrak eta Ainara Hita igantziarrak 18-12 irabazi zieten Ados Pilotako Alaitz Aioroa eta Naroa Elizalde iturendarrei.
Infantil mailan, Ardoi elkarteko Gomez eta Setuainek 18-15 irabazi zieten Arkupe elkarteko Nahia Almandoz eta Joana Iratzoki igantziarrei.
Kadete mailan, azkenik, Umore Onako Alize Sagardui goizuetarrak eta Araitz Legarreta aranoarrak 22-15 irabazi zieten Oberenako Crespori eta Sarrateari.
