Adosen Udaberri Torneoa Donamarian abiatuko da maiatzaren 11n

Ttipi-Ttapa 2024ko mai. 10a, 09:00

Ados elkartearen Udaberri torneoan ariko diren pilotarietako batzuk, tartean Etxebeste beratarra, Iturriaga leitzarra eta Etxekolonea zubietarra, ortzegunean Azpeitian egindako aurkezpenean.

Larunbatean 17:00etan hasiko den jardunaldian Mitxoletak eta (Iturriaga leitzarra, Ruiz de Larramendi eta Mendiburu, Maialen Akizu bertsolariarekin) Kukuprakak (Ruiz de Infante, Etxekolonea zubietarra eta Mujika, Sebastian Lizaso bertsolariarekin) izanen dira aurrez aurre

Ados pilota elkartearen Udaberri Torneoaren bigarren edizioaren aurkezpena egin zuten atzo Azpeitian. Iazko esperientzia aberasgarriaren ondotik gogotsu agertu ziren bertan parte hartuko duten protagonistak. Iaz bezala hiru pilotariko taldeak izanen dira lau taldetan banatuta. Talde bakoitzak bertsolari bat (Sebastian Lizaso, Maialen Akizu, Nerea Elustondo eta Aitor Sarriegi) izanen du botillero lanetan, bertso-pilota formatuan. Jaialdi bakoitzean bi partidu jokatuko dira, lehenengoa lau eta erdiaren barrenean eta bigarrena binaka. Ligaxkako bi talde hoberenen artean jokatuko dute finala Azpeitiko Frontoi Txikin. Txapelketako lehen jardunaldia Donamarian jokatuko dute maiatzaren 11n.

Zazpi jaialdi

Txapelketak zazpi jaialdi izanen ditu (Donamarian maiatzaren 11n, Olaberrian maiatzaren 17an, Itziarren maiatzaren 19an, Zestoan maiatzaren 25ean, Mendaron maiatzaren 31n, Atarrabian ekainaren 2an, eta finala Azpeitian ekainaren 8an) eta horien artean Atarrabian jokatuko dena berezia izanen da. Yala Nafarroan Palestinaren aldeko elkartearekin batera antolatu baita jaialdia. Beraz, bertan biltzen den dirua palestinarrei laguntzeko izango da.

Donamarian larunbatean, Mitxoletak eta Kukuprakak aurrez aurre

Txapelketa larunbat honetan hasiko da Donamarian, 17:00etan, Mitxoleten (Iturriaga leitzarra, Ruiz de Larramendi eta Mendiburu, Maialen Akizu bertsolariarekin) eta Kukupraken (Ruiz de Infante, Etxekolonea zubietarra eta Mujika, Sebastian Lizaso bertsolariarekin) arteko lehiarekin. Hilabete luzeko lanaren ondotik final handia Azpeitiako Frontoi txikin jokatuko dute ekainaren 8an.

Taldeak

KUKUPRAKAK: Ruiz de Infante, Etxekolonea zubietarra eta Mujika, Sebastian Lizaso bertsolariarekin

MITXOLETAK: Iturriaga leitzarra, Ruiz de Larramendi eta Mendiburu, Maialen Akizu bertsolariarekin

BITXILOREAK: Zabala, Barrokal eta Etxebeste beratarra, Aitor Sarriegi bertsolariarekin

EGUZKILOREAK: Orbegozo, Agirre eta Aldaregia, Nerea Elustondo bertsolariarekinq

Kirola Bortziriak Leitzaldea Malerreka Bera Leitza Zubieta

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun