Euskal Jai Berri Erremonte Fundazioak antolatutako Udaberriko erremonte txapelketako lehenbiziko jardunaldia jokatuko dute apirilaren 27an Zubirin. Larunbatean 19:00etan Esteribarko kiroldegiko pilotalekuan hasiko den jaialdiko txapelketako partidan Zeberio II.a eta Aimar Saldias oiztarra, Jon Sagaseta iruritarraren eta Ionen kontra jokatuko dute.
Jaialdiko lehen partidan, Matxin III.a eta Agirrezabala, Eloi Otxandorena doneztebarraren eta Aimar Leatxe donamariarraren kontra ariko dira.
ADANO elkartearen aldeko txapelketa izanen da eta Mariezkurrena eraikuntza enpresa da babesle nagusia. Sarrera hamar euro ordaindu beharko da (bortze euro 16 eta 22 urte artekoek eta ttikiagoek doan). E•remonte enpresako erremontisten kamisetak zozketatuko dituzte txapelketako jaialdi guztietan.
Bortz bikote lehiatuko dira txapelketa honetan eta finala ekainaren 28an jokatuko dute Doneztebeko Ezkurra pilotalekuan.