Nafarroako Kirol Jokoetan, nesken jubenil, kadete lehen mailako eta kadeteen bigarren mailako buruz buruko txapelketetako finalak jokatu zituzten martxoaren 1ean, ortzirale arratsaldean Iruñeko Labrit pilotalekuan. Hiru finaletako sei pilotarietatik bortz eskualdekoak ziren eta hiru txapelak eskualdera etorri ziren, Leitzara, Goizuetara eta Sunbillara.
Jubenil mailako finalean, Aurrerako Goiuri Zabaleta leitzarrak 22-7 irabazi zion Errekako Nahia Bertiz sunbildarrari.
Lehen mailako kadetetan, Umore Onako Alize Sagardui goizuetarrak 22-18 irabazi zion Larraungo Sotili.
Bigarren mailako kadetetan, Adoseko Iraide Iriarte sunbildarrak 22-16 irabazi zion Aurrerako Uxue Mariezkurrena leitzarrari.
Sagardui Master Laboral Kutxako finalera
Ez da asteburu honetan Alize Sagardui goizuetarrak lortu duen garaipen garrantzitsu bakarra. Igandean Elgoibarren jokatu zituzten Master Laboral Kutxa eskuz binakako txapelketako finalerdiak, gazte mailan pilota mistoarekin. Sagarduik, Uxue Gomezekin bikote eginez, 18-8 irabazu zien Irene Azkonari eta Naia Uriarteri. Beste finalerdian, Ainhitze Arratibelek eta June Agirrebeitiak 18-13 irabazi zieten Sara Aretxagari eta Eider Perezi. Beraz, finalean, Sagardui eta Gomez, Arratibel eta Agirrebeitiaren kontra ariko dira.
