Euskal Herriko sokatira txapelketaren barrenean hiru kategoriatako lehia izan dute asteburu honetan. Larunbat arratsaldean, Oiartzunen, gizonezkoen 600 kiloko eta emakumeen 500 kiloko bigarren jardunaldia jokatu zuten eta igande goizean, Lesakan, txapelketa mistoko kanporaketa. Hiruetan finalerako txartelak zeuden jokoan eta hiruetan tiraldi guztiak irabazi zituzten Beti Gazteko taldeek. Amaiurrek ere hiru finaletan sartzea lortu du.
Larunbatean Oiartzunen, emakumeen 500 kiloko kategorian tiraldi guztiak irabazi zituen Beti Gaztek. Kategoria honetako lehen jardunaldian berdindu egin zuten lesakarrek Ibarrarekin, baina bigarrenean nagusi izan ziren. Ibarra bigarren izan zen, hirugarren postuan berdindu egin zuten Badaiotzek eta Txantreak, bosgarren Amaiur izan zen, Abadiño seigarren eta Berriozar zazpigarren. Honela, Berriozar izan ezik, gainerako talde guztiak urtarrilaren 27an Pobesen (Araba) jokatuko den finalean izanen dira.
Gizonezkoen 600 kiloko bigarren jardunaldian ere, lehenbizikoan bezala, Beti Gaztek irabazi zituen tiraldi guztiak. Ondotik sailkatu ziren Berriozar, Ñapurrak, Ibarra, Zuraide B, Amaiur, Zuraide A, Abadiño, Murueta eta Txantrea. Bi jardunaldietako puntuak kontuan hartuz, urtarrilaren 20an Gernikan (Bizkaia) jokatuko den finalerako Beti Gazte, Ñapurrak, Berriozar, Zuraide A, Ibarra eta Amaiur sailkatu dira.
Igandean Lesakan txapelketa mistoko kanporaketa
Igandean Lesakan jokatu zen txapelketa mistoko kanporaketa eta, honetan ere, Beti Gazte nagusitu zen tiraldi guztietan. Ondotik sailkatu ziren Berriozar, Ibarra, Amaiur, Abadiño B eta Txantrea. Sei talde hauek izanen dira urtarrilaren 21ean Ozaetan (Araba) jokatuko den finalean. Finaletik kanpo gelditu ziren Badaiotz, Abadiño A eta Antsoain.