Martxoaren 15ean, ortziralea, Baztanen
Hasi eta biharamunean, martxoaren 15ean, ortziralean ailegatuko da Korrika Baztanera. 13:16ean sartuko da Baztanen Izpegin barna. Handik Erratzurako bidea hartuko da eta 14:14ean ailegatuko da bertara. Erratzu gibelean utzi eta Arizkunera joanen da (14:34), handik Elbetera (15:04), Elizondora (15:08) eta Iruritara (15:26). Iruritatik Artesiagan barna, Eugirako bidea hartuko du lasterketak eta Nafarroako Pirinioetan bukatu du eguna.
Martxoaren 19an, asteartea, Leitzan eta Goizuetan
Martxoaren 19an, asteartea, berriz ere bisita eginen du eskualdean Korrika, eta 15 urteren ondotik, Goizuetara ailegatuko da. Uitzin barrena, 16:31ean sartuko da Korrika Leitzako herrigunera. Leitza gurutzatu eta handik Goizuetara joanen da lasterketa NA-4150 errepidean barna eta 18:38ean ailegatuko da Goizuetara. Hernanirako bidea hartuko du , eta 20:16ean utziko du Nafarroa euskararen aldeko lasterketak.
Martxoaren 24an, igandea, Bortzirietan eta Xaretan
Lasterketa Baionan bukatu aitzinetik, igande goizaldean Bortzirietatik eta Xaretatik pasako da Korrika. Oiartzunen barna ailegatuko da Lesakara. 01:43ean sartuko da lasterketa Nafarroan, eta 03:25ean sartuko da Lesakara. Handik Berarako bidea hartuko du lasterketak, eta Agerrara 04:01ean ailegatuko da. Handik, Lizuniagan barna Sararako bidea eginen du.
04:45ean Lizuniagako tontorrean Sartuko da Lapurdira eta aurreikusia dago 05:17ean Sarako herrigunera ailegatzea. Handik Senpererako bidea hartuko du, eta 06:09ean sartuko da Senperen. 06:59an utziko du Senpere lasterketak eta ordu batzuk beranduago, 12:29ean bukatuko da Korrika Baionako Askatasunaren plazan.
Korrikaren aplikazioa itxuraberritua
Aurtengo korrikaren nobedadeetako bat aplikazioaren itxura eraberritua da. Aitzineko ediziotik hona, guztiz itxuraldatuta dute: hainbat atal berri ditu; adibidez, Korrika Laguntzaile txartela txertatuta dakar, eta aplikazioaren baitan eramateko aukera eskaintzen du, mugikorrean bertan. Horrez gain, astero Korrika Laguntzaileen artean egiten diren zozketa eta irabazleak ere ageri dira.
Ibilbideari lotuta, Korrika zuzenean jarraitzeko aukera ere emanen du: furgonetaren geolokalizazioaren bidez, korrikalariek jakinen dute Korrika aurrerapenez ala atzerapenez heldu den, hau da, aplikazioaren erabiltzaileek une oro egiaztatu ahal izanen dute nondik dabilen lasterketa.