Pelikuletako soinu bandak entzungai izanen dituzte larunbatean Lesakan

Ttipi-Ttapa 2023ko abenduaren 19a

Lesakako musika bandako kideak, Mikel Iriarte zuzendariari azaroan egindako omenaldian. Larunbat eguerdian Elizondoko musika bandakoekin batera joko dute.

'Ez gara Felix Linares baina…' kontzertua emanen du Lesakako eta Elizondoko bandek elkarrekin osatutako Baztan-Bidasoko musika bandak Harriondoan 12:00etan

Lesakako musika bandak eta Elizondoko Recreo musika bandak elkarlanean osatutako Baztan-Bidasoko bandak Ez gara Felix Linares baina… kontzertua antolatu du abenduaren 23an, larunbatean 12:00etan Harriondoa kultur etxean, udalaren laguntzarekin. Pelikuletako soinu bandak joko ditu bandak, Maite Bidarteren eta Juanen Saralegiren aurkezpenekin. Sarrerak 6 eurotan salgai daude dagoeneko Xagu eta Telletxea liburu dendetan eta udalaren webgunean ere (www.lesaka.eus) eskura daitezke.

Emanaldi honekin bukatuko da Harriondoa kultur etxearen hamargarren ospatzeko Sorginxulo Lesakako Kultur Bilguneak eta Lesakako udalak antolatutako ‘Hamar urte, hamaika dinamika’ proiektuaren egitaraua.

Dena den, Lesakako eta Elizondoko musika bandek Elizondon ere eskainiko dute ‘Ez gara Felix Linares baina…’ kontzertua abenduaren 30ean.

Musika Eskolaren Eguberrietako kontzertua

Emanaldi honen bezperan, abenduaren 22an, ortziralean 18:00etan, Lesakako Musika Eskolak Eguberrietako kontzertua emanen du Harriondoan.

Kultura Baztan Bortziriak Elizondo Lesaka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun