Laxoa Elkarteak antolatutako Nafarroako paxaka txapelketaren 24. edizioko finala jokatu zuten igandean Iruritako Aranabian eta pronostikoak betez, lehen fasean nagusi izan ziren Oizko Ioritz Zelaieta, Iker Bereau eta Laurendi Zelaietak ez zieten aukerarik eman Jon Sagaseta (Gorka Urtasunen partez), Mikel Sagaseta (Irurita) eta Juan Mari Maiari (Elizondo). Baztandarrek lehen jokoa egin bazuten ere, oiztarrak 9-3 nagusitu ziren.
Berdintasun handiagoa izan zen hirugarren posturako partidan. Jon Apeztegiak (Doneztebe), Mikel Telletxeak (Doneztebe) eta Ugutz Zelaietak (Oiz) 9-6 irabazi zieten Manu Irigoien (Erratzu), Egoitz Prim (Irurita) eta Kaiet Itoizi (Erratzu).
Sari banaketan izan ziren Javier Conde, Nafarroako Pilota Federazioko presidentea; Rober Irigoien eta Sara Dorregarai, Iruritako alkate eta alkateordea eta Laxoa Elkarteko ordezkariak.