Zubietan 09:00etan
Zubietan izanen dira udalak osatzen goiztiarrenak. 09:00etan egin dute hitzordua eta hantxe berretsiko du 2015etik Zubietako alkatea den Ernesto Dominguez Oleak kargua. Berarekin batera, Herriko Taldeko Ezekiel Loiarte Santestebanek, Martxel Elizalde Elizaldek, Ainhoa Mindegia Santestebanek, Periko Hilario Santesteban Loiartek eta Txomin Hualde Elizaldek hartuko dute kargua. Aulki Zuriak taldeak zinegotzi bat lortzeko adina boto lortu zuen hauteskundeetan Zubietan, baina kargurik ez duela hartuko errana du.
Arantzan 10:00etan
Arantzan eginen dute udalak osatzeko hurrengo bilera, 10:00etan. Azken lau urteotan alkate izan den EH Bilduko Dabid Iturria Almandozen lekukoa hartuz, talde bereko Xatur Larralde Ibarrolaren esku geldituko da alkatetza. Azaroko hauteskundeetan Arantzan EH Bilduk zazpi ordezkariak lortu zituen eta hala, Larralderekin batera, Leire Mitxelena Gamiok, Igor Ugalde Salazarrek, Ana Maeztu Villanuevak, Andoni Mitxelena Danborienak, Itziar Arozena Bergarak eta Julen Oskoz Elizondok hartuko dute kargua. Aulki Zuriak taldeak lau boto baino ez zituen lortu Arantzan.
Eratsunen 11:00etan
Eratsunen, berriz, 11:00etan eginen dute batzarra. Pausoz Pauso taldeak gidatuko du ondoko lau urteetan udalbatza. Horien artean, alkatearen aginte makila Nagore Eskudero Baleztenak hartuko du eta berarekin batera, Raquel Telletxea Santesteban, Ana Isabel Mariezkurrena Murgia, Nekane Bendoiro Urroz eta Patxi Mariezkurrena Deskarga izanen dira zinegotziak. Kasu honetan, Saiatu taldeko kideak ordezkaririk gabe gelditu dira.