Gizonezkoak bigarren izan ziren, emakumezkoak hirugarren eta txapelketa mistoko bi taldeak bigarren eta hirugarren
Euskal Herriko launakako eta zortzinakako txapelketa ofizialen artean, Berriozar Kirol Elkarteak Euskal sokatira 4x4 jaialdia antolatu zuen azaroaren 19an. Guztira, Euskal Herri osoko 11 klubetako 42 talde lehiatu ziren, egun osoko ospakizunean. Tartean bazkaria eta kontzertuak ere izan ziren. Kirol emaitzei dagokienez, Lesakako Beti Gazteko taldeak podiumera igo ziren hiru kategoriatan, baina ez zuten txapelik lortu. Amaiurko taldeak ere aritu ziren.
Honela, Beti Gazteko gizonezkoak 300 kiloko kategorian lehiatu ziren eta bigarren izan ziren, Berriozarren gibeletik eta Zuraideren aitzinetik.
Emakumezkoak, berriz, 245 kiloko kategorian aritu ziren eta hirugarren izan ziren podiumean, Ibarra eta Berriozarren gibeletik.
Txapelketa mistoan, azkenik, goma gainean paratu zituen bi taldeak podiumera igo zituen Beti Gaztek, bigarren eta hirugarren, Berriozarren gibeletik.
23 urtez beheitiko txapelketan Abadiño izan zen txapeldun, Berriozar eta Txantrearen aitzinetik.