Nafarroako lehen mailako aizkolari txapelketaren finala jokatu zen azaroaren 17an, Doneztebeko feria egunean, Doneztebeko Ezkurra pilotalekuan. Pronostikoa bete eta Otsagabiko Iker Vicentek bere bederatzigarren txapela jantzi zuen. Arribeko Ibai Soroa eta Leitzako Jon Rekondo izan zituen lagun podiumean.
Espero bezala, Iker Vicente izan zen bizkorrena lau kanaerdikoak, lau 60 ontzakoak eta bi oinbikoak mozten. Ordu erdi baino guttiago behar izan zuen lan hori burutzeko (28.35). Ia sei minutuko aldea atera zion bigarren izan zen Ibai Soroari (34.30) eta zazpi minutu baino gehiagokoa hirugarren izan zen Jon Rekondo leitzarrari (35.53). Laugarren Zigako Joxean Etxeberria izan zen (39.45) eta bosgarren Arribeko Txomin Amundarain (42.03).
Bederatzigarren txapelarekin, Floren Nazabal berdindu du Vicentek eta txapel bakarrera du Mikel Mindegiaren errekorra (hamar lortu zituen).
Aizkolarien txapelketa ofizialaz gain, Olaia Esnaola azpeitiarrak eta Udane Ostolaza oriotarrak erakustaldia egin zuten harri-jasotzen.