Lesakako Beti Gazteko sokatira taldeek ez zuten hutsik egin eta, pronostikoak betez, Nafarroako gizonezkoen eta emakumezkoen sokatira txapelak jantzi zituzten igande eguerdian Berako Eztegara pilotalekuan. Amaiur ere bi kategoriatan podiumean izan zen, bigarren emakumezkoetan eta hirugarren gizonezkoetan.
Gizonezkoak zortzinaka aritu dira, 620 kiloko kategorian eta Elizondoko lehen jardunaldian bezalaxe, Beran ere Beti Gazte nagusitu zen tiraldi guzietan. Bigarren posturako, aldiz, Berriozar nagusitu zitzaion Amaiurri (Elizondon Amaiur izan zen bigarren). Txantrea laugarren izan zen, Antsoainen aitzinetik. Beti Gazteko zortzikote txapeldunean Ander Mitxelena, Oskar Telletxea (Igantzi), Iker Pikabea, Beñardo Iantzi, Beñat Ordoki, Unai Gurrutxaga, Iñigo Altzugarai eta Gerardo Telletxea aritu ziren tiran, Joxe Angel Mitxelena entrenatzaile zutela. Unai Leiza ere aritu da tiran txapelketan.
Emakumeak, berriz, seinaka aritu dira, 385 kiloko kategorian. Honetan ere, Elizondoko lehen jardunaldian bezala, Beti Gaztek irabazi zituen tiraldi guztiak Beran, Amaiur izan zen bigarren, Berriozar hirugarren, Txantrea laugarren, Araxes bosgarren eta Antsoain seigarren. Beti Gazteko seikote txapeldunean Irantzu Goienetxe, Karmele Pikabea, Irati Andueza (Doneztebe), Ainhoa Etxegarai (Bera), Ainhoa Ubiria eta Maria Iantzi (Igantzi) aritu dira tiran, Joxe Angel Mitxelena entrenatzaile eta Maialen Lopez laguntzaile zutela.
Sariak eta txapelak banatzen izan ziren Jon Telletxea Nafarroako Herri Kirol Federazioko presidentea, Aitor Elexpuru Berako alkatea, Angel Pombar Berako kirol zinegotzia eta Nerea Sorondo Berako aizkolaria.
Euskal Herriko 4x4 sokatira txapelketa datorren asteburuan
Nafarroako txapelketako txapel guztien jabe egin da, beraz, Beti Gazte (mistoa, gizonezkoena eta emakumeena). Behin Nafarroako txapelketa bukatuta, Euskal Herriko 4x4 txapelketa jokatuko da datorren asteburuan. Azaroaren 11n, larunbatean, emakumezkoen (250 kilo) eta gizonezkoen (310) kategorietako txapelketa jokatuko dute Ibarran (Gipuzkoa) eta azaroaren 12an, igandean, kategoria mistokoa (280 kilo) Antsoainen.
Txapelketa ofizial honen ondotik, 4x4 sokatira jaialdia ere izanen da azaroaren 19an Berriozarren.
Euskal Herriko zortzinakakoa azaroaren 24an hasiko da Munduko txapelketari begira
Launakako lanak bukatuta, azaroaren 24ko asteburuan hasiko da Euskal Herriko zortzinakako sokatira txapelketa. Heldu den urteko otsailaren 8tik 11ra Munduko txapelketa Suediako Helsinborg hirian jokatuko dela kontuan hartuz, txapelketa garrantzitsua izanen da, bertan erabakitzen baita zein taldek ordezkatuko duen Euskal Herria, Basque Country, nazioarteko lehian.