Emakume aizkolariek sei pago enbor moztu behar zituzten finalean: bi kanaerdiko, bi 45 ontzako eta bi 36 aontzako. Nerea Arrutik 17 minutu eta 59 segundo aski izan zituen lana burutzeko. Ia lau minutuko aldea atera zion bigarren izan zen Nerea Sorondo beratarrari (21.54) eta zazpi minutu baino gehiagokoa hirugarren izan zen Oihana Fernandez de Barrena arabarrari (25.10). Laugarren postuan Ane Zapirain sailkatu zen (29.13), bosgarren Maika Ariztegi iturendarra (30.59) eta seigarren Malen Barrenetxea (35.26).
Oihan Larretxea bigarren mailako finalera
Elgoibarko jaialdi berean Euskal Herriko bigarren mailako gizonezkoen aizkolari txapelketako kanporaketa ere jokatu zuten. Zazpi aizkolari aritu ziren lehian, finalerako hiru txartelen bila eta Oihan Larretxea beratarra nagusitu zen. 18 minutu eta 17 segundo behar izan zituen 54 ontzako hiru enbor, 60 ontzako enbor bat eta 72 ontzako enbor bat mozteko. Larretxearekin batera Aritz Irazabal bizkaitarrak (18.57) eta Segoviako Jon Rodriguezek (20.52) lortu zuten finalerako txartela. Finaletik kanpo gelditu ziren Cesar Fernandez de Landa (21.15), Ibon Garaiburu (22.57), Iker Gorriti (25.25) eta Josu Santamaria (26.35).