Bi On Be plataforma Irungo Be On Sports SL enpresak sustatu zuen, eta duela bi urtetik Akitania Berria –Euskadi–Nafarroa Euroeskualdearen babesa du. Be On Sports-ek plataforma garatzeko prozesuan jarraitzen du, irisgarritasunera eta inklusiora bideratutako proiektu berri batekin. Proiektu hori Ligue Sport Adapté de Nouvelle-Aquitaine erakundearekin eta Malerreka Common Zerbitzuak mikrokooperatiba nafarrarekin batera gauzatuko du eta gizarteratzean eta laneratzean zentratuko da. Bi On Be guztiontzat azken deialdian hautatutako 20 proiektuetako bat izan da.
Gogoratu behar da Bi On Be-ren jatorria kirola eta jarduera fisikoa osasunaren eta ongizatearen mesedetan sustatzeko plataforma digitala izatea zela, Euroeskualdearen lurraldeak eskaintzen dituen aukera guztiak modu egituratuan balioetsiz, Bidasoako eskualdean kokatutako bere bihotzetik abiatuta. Klubek eta elkarteek zuzendutako jarduerez, udal dinamika eta instalazioez, grupetak bezalakoak diren taldean egiteko ekimenez, natur guneetako jarduera eta ibilbideez eta abar ari gara.
Proiektuaren dimentsio soziala ardatz duen bigarren fase honetan, Be On Sports-ek ekintza berriak eta kultura-aberastasuna ekarriko dituzten bi eragile berrirekin lankidetzan jardungo du, eta, batez ere, ahaztuta dauden kolektiboei arreta berezia eskainiko die.
Baztan-Bidasoaldean Malerreka Common Zerbitzuak
Malerreka Common Zerbitzuak izeneko elkarteak Baztan-Bidasoaldean baztertuta geratzeko arriskuan dauden pertsonak laneratzen eta gizarteratzen laguntzea du helburu, enpleguaren eta prestakuntzaren bidez. Proiektuari bere esperientzia gehituko dio eta kirola (eta kirolerako sarbidea) erabiliko du gizarteratzeko elementu gisa.
Ligue Sport Adapté Nouvelle-Aquitaine erakundeak, bere aldetik, ia 10.000 kide ditu Akitania Berrian (58.000 Frantzian) bere lurraldeko 200 klub afiliatu baino gehiagotan. Adimen-desgaitasuna, nahasmendu mentala eta/edo neurogarapenaren nahasmendua, autismoaren espektroko trastornoa barne, duten pertsonekin duen esperientziari esker, aplikazioaren edukiak egokitu ahal izango ditu, ahalik eta pertsona gehienek eskuragarri izan dezaten.
Bi On Be programaren helburua da, bi bazkideen laguntzarekin eta aholkularitzarekin, jarduera fisikoen eta kirol-jardueren eskaintza modu arin eta funtzionalean eskuragarri izatea mundu guztiarentzat, modu inklusiboan, eta bereziki kirol egokituaren sustapena azpimarratuz. Nahi duenak nahi duen jarduera erraz eta azkar aurkitzeko aukera izatea da helburu nagusia, Bi On Bek berariaz sortutako bilaketa-motor aurreratuari esker. Erabiltzaileak, gainera, bere profila pertsonalizatu ahal izango du bere interes, ohitura eta motibazioen arabera, eta bere esperientziak besteekin partekatu ahal izango ditu. Gainera erabiltzaileak bere profila pertsonalizatu ahal izango du bere interes, ohituren eta motibazioen arabera, eta bere esperientziak besteekin partekatu.
Mugaz gaindiko proiektu unibertsala
Plataforma eskalagarria eta erreplikagarria izateko diseinatuta dago, eta tokiko hiru hizkuntzetan dago eskuragarri (euskara, gaztelania eta frantsesa), baita ingelesez ere. Horrela, mugaz gaindiko nortasunari eta eleaniztasuna modu naturalean sustatzeko bokazioari erantzuten dio.
Be On Sports Igor Emeryk zuzentzen du, Irungo Real Union Clubeko presidenteak, eta irmo sinesten du kirolak sozializazio-tresna gisa duen potentzialean: «Bi On Be-ren jatorrizko helburua pertsona bakoitza bere erara eta kirol-jardueraren bidez ondo sentitzera iristea da. Kasu honetan, beste urrats bat eman nahi dugu irisgarritasun unibertsal eta pertsonalizatu horretarako bidean. Irisgarritasun hori desgaitasun intelektuala duten edo gizarte-bazterketa jasaten duten pertsonekin konprometitutako bi eragilerekin batera lantzen ari gara».
Euroeskualdeko zuzendariak gaineratu duenez, «kirola gure Plan Estrategikoaren ardatzetako bat da, eta pertsonen gizarteratzea errazteko oso tresna indartsua. Bi On Be proiektuaren bigarren fase honen bidez, gizarteratzeko zailtasunen bat duten pertsonengana hurbildu nahi dugu, aniztasun funtzionala duten edo gizarte-bazterketa jasateko arriskuan dauden pertsonengana. Horretarako, proiektua sustatu duten hiru eragileen lankidetza ezinbestekoa izango da ».
Isabel Elizalde: «Kirolaren bidez gizarteratzeko aukera berriei aterak irekitzen dizkigu proiektu honek»
Malerreka Common Zerbitzuetako Isabel Elizaldek adierazi duenez, “mikrokooperatibako taldea osatzen dugunok uste dugu proiektu honek ateak irekitzen dizkigula kirolaren bidez gizarteratzeko aukera berriei, gure langile eta familientzat. Gure ustez, mugaz gaindiko lankidetza-proiektu honen bidez gure inguruetako errealitatearen zati garrantzitsu bat ikusarazten eta gizarte bidezko eta inklusiboa sortzen laguntzen dugu».
Ligue Sport Adapté Nouvelle Aquitaine erakundearen arduradunek, bertzalde, uste dute «plataforma funtsezko tresna izan daitekeela dibertsitate funtzionala duten kirolari guztiei beren beharretara egokitutako eskaintzaren berri emateko, baina baita erabiltzaile horien eta zerbitzu egokitu horiek eskaintzen dituzten kluben arteko loturak sortzeko ere».