Nafarroako Estatistika Institutuak herritarren batezbesteko soldata gordinaren datuak argitaratu ditu. Azken datuak 2021ekoak dira, baina 2012tik izan den bilakaera ere ikus daiteke beheko infografian. Horren arabera, Arano, Areso, Goizueta eta Leitzako herritarrak dira soldatarik altuena dutenak.
Udalerriz udalerri 2012tik 2021era bitartean herritarren batezbesteko soldata gordina zenbatekoa den ageri da ondoko taulan. Nafarroako Estatistika Institutuak jakinarazi duenez, 2.000 biztanletik goitiko udalerrietako datuak (izartxoa dutenak) errealak dira, TTIPI-TTAPAk hartzen duen eremuaren kasuan, Baztan, Bera, Leitza eta Lesakakoak. Gainerako udalerrietako datuak, «datu gutti daudelako» eremu bakoitzeko (Bortziriak, Malerreka…) batezbestekoetara berdindu dituzte.
Datuen arabera, Arano, Areso, Goizueta eta Leitzako herritarrek dute soldata gordinik altuena, eta aldiz, Malerreka eta Bertizaranakoek eskualdeko baxuena.
Hortik aparte, deigarria eta salagarria da gizonezkoen eta emakumezkoen soldaten artean dagoen alde nabarmena. 2021ean gizonezkoek emakumezkoek baino % 21 gehiago kobratzen dute eskualdean eta Nafarroan %25ekoa da aldea. Eskualdean 2012tik 2021era gizonezkoen eta emakumezkoen soldaten arteko aldea gora-beherak izan baditu ere, 2018az geroztik diferentziak murrizteko joera hartu dute. Halere, diferentzia ikaragarria da.