Erremontari Herriz Herri txapelketako finalak jokatuko dituzte igandean Zumarragan

Ttipi-Ttapa 2023ko eka. 16a, 13:30

Igandeko finaletan ariko diren zortzi erremontistetatik bortz izan ziren aurkezpenean, tartean Juanenea saldiastarra eta Apezetxea goizuetarra. Ezkurra II.a doneztebarra falta zen.

Maila nagusian, Josetxo Ezkurra II.a doneztebarra eta Aritz Juanenea saldiastarra, Goikoetxea V.a eta Azpirozen kontra ariko dira eta promesa mailan, Gurrutxaga eta Apezetxea goizueatrra, Zaldua II.a eta Eskuderoren kontra

Erremontari Herriz Herri txapelketako finalak jokatuko dituzte Zumarragako Beloki pilotalekuan ekainaren 18an, igandean 12:00etan hasita. Promesa mailan, Gurrutxagak eta Oier Apezetxea goizuetarrak, Zaldua II.a eta Eskuderoren kontra jokatuko dute. Maila nagusian, berriz, Josetxo Ezkurra II.a doneztebarrak eta astelehenean Sagardoaren txapelketa irabazi zuen Aritz Juanenea saldiastarrak, Goikoetxea V.a eta Azpirozen kontra jokatuko dute.

Finalak atzo aurkeztu zituzten, Beloki pilotalekuan bertan. Ekitaldian, Xabier Gonzalez Oriamendi enpresako kudeatzaileak, finalean parte hartuko dute bortz pilotarik (Eskudero, Juanenea, Gurrutxaga, Goikoetxea V.a eta Apezetxea) eta Mikel Serrano alkateak parte hartu zuten.

Erremontari Herriz Herri txapelketaren helburua erremontea Galarreta pilotalekutik ateratzea da eta horretarako partidak hainbat herritako pilotalekuetan jokatu dituzte. Zumarragako Beloki pilotalekuan ez da erremonte partidarik jokatu orain arte. Atzo, aurkezpenaren ondotik, sarea zabaldu zuten eta pilota aukeraketa egin zuten.

Kirola Leitzaldea Malerreka Goizueta Doneztebe Saldias

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun