400 kilometrotan kultura, osasuna, ekologia eta parekidetasuna bezalako baloreak indartzea izanen dute helburu EuskarAbenturan, «euskaratik eta euskaraz».
Berrikuntzak
Aurten diasporako bi gaztek parte hartuko dute EuskarAbenturan: Valentziakoa bat eta Buenos Aireskoa bertzea. 2019an izan ziren azkenekoz diasporako gazteak espedizioan.
Horrez gain, EHUko eta Iker-eko ikerlari bana ere EuskarAbenturan lanean ari dira. Azler Gartziak eta Iñigo Urrestarazuk gazteen ahoskeraren eboluzioa aztertuko dute, espedizioan, aitzinetik eta ondotik hartutako datuekin. Horiekin batera, Irati Fernandez euskara teknikariak Eusko Jaurlaritzak diruz lagundutako ikerketaren ardura izanen du; «EuskarAbenturak gazteen hizkuntza ohituretan eta hizkuntzekiko beren jarreretan duen eragina aztertu nahi du lan horrek».
125 gazteren artean doneztebar bat
Errealitate linguistiko, sozial, ekonomiko eta kultural anitzekoek parte hartuko dute EuskarAbenturan. Gehienak bizkaitarrak dira, 45 gazte (% 36); gipuzkoarrak 30 dira (% 24); Nafarroatik 26 etorriko dira, tartean, doneztebar batek parte hartuko du (% 20,8); Arabatik 12 (% 9,6); Lapurditik 5 (% 4); Nafarroa Beheretik 3 (% 2,4) eta Zuberoatik eta diasporatik bina (% 1,6). Taldearen % 57,6 emakumezkoa da (72 neska), % 41,6 gizonezkoa (52 mutil) eta generoa ez zehaztea nahiago izan duen gazte bat ere bada (% 0,8).
Eta gazteekin batera, 30 laguneko lantaldea joanen da: bi koordinatzaile, hamar xerpa edo begirale, lau xerpa laguntzaile, bi xerpa buru, hiru mediku, bi erizain, bi gidari, euskara teknikari bat, bi argazkilari, kamerarekin bat eta komunikazio arduradun bat.
Ibilbidea
EuskarAbenturak 32 herri zeharkatuko ditu, oinez 400 kilometro eginez. Maule, Pagola, Larzabale, Donibane-Garazi, Xabier, Irunberri, Urrotz, Iruña, Gares, Añana-Gesaltza, Argantzun, Gasteiz, Araia, Zerain, Ataun, Tolosa, Lesaka, Urdazubi, Amaiur, Baiona, Urruña, Donostia, Getaria, Deba, Ekainberri, Lekeitio, Nabarniz, Gernika, Sukarrieta, Bermeo, Bilbo eta Getxo.