Uztailaren 19ra arte ematen ahal da botoa posta bidez
Hauteskundeen Araubide Orokorrari buruzko Lege Organikoak (LOREG) adierazten duenez, posta bidezko botoa eskatzeko epea hauteskunde deialdiaren biharamunean hasiko da eta bozketa egin aitzineko hamargarren eguna izanen da tramitazioa egiteko azken eguna.
Nola eman botoa postaz
Dagoeneko eska daiteke posta bidezko botoa Correos-eko bulegoetan presentzialki edo online hemen klikatuta. Online eskatuz gero, eskatzaileak ziurtagiri digitala edo Nortasun Agiri digitala izan beharko ditu tramitea egiteko.
Eskatzerakoan, Correos-eko enplegatuari jatorrizko Nortasun Agiria, pasaportea edo gidabaimena aurkeztu beharko zaio.
Inprimakian hauteskunde dokumentazioa zein posta helbidetara bidaltzea nahi duzun adieraziko duzu (helbidea, lantokia edo posta kutxa izan daiteke).
Hautesle Erroldaren Bulegoak honako dokumentazio hau bidaliko dizu adierazitako helbidera:
Hautesle Erroldaren Bulegoak honako dokumentazio hau bidaliko dizu adierazitako helbidera:
- Hauteskunde hauetara aurkezten den alderdi politiko bakoitzaren boto-paper bana.
- Bozketa gutun-azal bat prozesu bakoitzerako (Kongresua eta Senatua)
- Erroldako inskripzio ziurtagiria.
- Gutun-azal bat zure hauteskunde mahaiko informazioarekin.
- Azalpen orri bat.
Dokumentazioa hartu ondotik, aukeratu boto txartela eta sartu botoa emateko dagokion gutun-azalean (edo ez sartu boto-orria zuri bozkatzea erabakitzen baduzu).
- Sartu gutun-azala edo gutun-azalak eta baita erroldako inskripzio ziurtagiria ere, hauteskunde-mahaiaren helbidea idatzita dagoen gutun-azalean.
- Ez sartu zure nortasuna egiaztatzen duen dokumenturik bozketa-gutun-azalean, kasu honetan mahaiak zure botoa baliogabetzat joko lukeelako.
- Eraman gutun-azal hori posta bulego batera eta bidali posta ziurtatu bidez, hauteskundeak egin aurreko hirugarren eguna baino lehen. Bidalketa doakoa da.
Hauteskunde egunean, postariek posta bidez bidalitako botoak hauteskunde-mahaietara eramanen dituzte eta bozketa bukatu ondotik, eta botoen zenbaketa hasi baino lehen, postaz bidalitako botoen gutun-azalak hautetsontzian sartuko dituzte.
Iritzia aldatu eta botoa presentzialki eman dezaket?
Ez. Posta bidez botoa ematea eskatzen baduzu, eta zure eskaera onartzen bada, hauteskunde egunean ezin izanen duzu presentzialki bozkatu zure hauteskunde mahaian.