Asteburuko uholdeek 4 eta 5 milioi euro arteko kalte materialak eragin dituzte Aranon, Beran eta Lesakan

Ttipi-Ttapa 2023ko mai. 23a, 07:30
Uholdearen arrastoak garbitzen Berako Legia karrikan

Aseguruen Konpentsazio Partzuergoaren lehen kalkuluen arabera, asteburuko uholdeek 4 eta 5 milioi euro arteko kalte materialak eragin dituzte Aranon, Beran eta Lesakan. Denetara 340-400 dira kalteak izan dituztenak, guti gora-behera honelaxe banatuak: 185 etxebizitza, 95 ibilgailu, 55 establezimendu eta 5 azpiegitura. Asteazken honetan Nafarroako Gobernuak eginen duen bileran onartuko du Hondamendi Eremu izendatzeko eskaera egitea Espainiako Gobernuari.

Azken orduotan izandako batzarretan, Arano, Bera eta Lesakako udal ordezkariek eta Foru Gobernuak adostu dute herri hauek hondamendi eremu izendatzeko eskaria egitea Espainiako Gobernuari. Hala jakinarazi du Javier Remirez Nafarroako Gobernuko lehen presidenteorde eta Presidentzia, Berdintasun, Funtzio Publiko eta Barne kontseilariak, eta erantsi du asteazkeneko gobernu bileran onartuko dutela eskari hori egitea. 

Hondamendi Eremu izendatzeak zertan eraginen die kalteak izan dituztenei?

174/2015 Legeak Gobernuak emanen dituen dirulaguntzak eta har ditzakeen neurriak zeintzuk izanen diren ere zehazten du. Hala ere, hagitz argi uzten du ez direla kalte-ordainak izanen, normaltasuna berreskuratzeko ematen diren laguntzak baizik. Hauek dira Gobernuak ezar ditzakeenak:

  • Kalte pertsonalen ondorengo dirulaguntzak
  • Etxebizitzan izandako kalteei aurre egiteko dirulaguntzak
  • Gerorako utzi ezin diren ekintzak egiteko dirulaguntzak udalei
  • Industria, komertzio edo zerbitzuen arloko enpresei laguntzak
  • Udal azpiegiturak edo errepideak konpontzeko laguntzak
  • Nekazaritzan, abeltzaintzan edo mendietan izandako kalteak konpontzeko laguntzak
  • ICOren bidez mailegu-lineak zabaltzea
  • Neurri fiskalak
  • Gizarte Segurantzaren edo lan-kontuen inguruko bertzelako neurriak

Espainiako Gobernuaren aldetik dirulaguntza eta neurri hauek etor badaitezke ere, adituek norbanako eta enpresei gomendatzen diete ez itxaroteko izendapena izan arte. Norberaren aseguru-etxeekin edota aseguruen partzuergoarekin beharrezko izapideak lehenbailehen hasteko gomendatzen dute.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun