Udaberriko erremonte profesionaleko CaixaBank Sari Nagusiko final laurdenetako ligaxkako jardunaldi bikoitza izanen dute apirilaren 23an. Igande arratsaldean eskualdeari kuku eginen dio txapelketak, Aranabian 17:00etan hasiko den jaialdiko bigarren partidan, txapelketakoan, Zeberio II.a eta Otano, Xanti Uterga doneztebarraren eta Barricart-en kontra ariko baitira.
Iruritako jaialdia hasteko, berriki profesionaletan hasiak diren herriko bi semeren arteko lehia ikusteko aukera izanen da. Xuban Iturregi eta Jon Sagaseta ariko dira aitzineko koadroetan, gibelean Ion eta Aimar Saldias oiztarra lagun dituztela, hurrenez hurren.
Txapelketako jaialdi guztietan bezala, hamar euroko sarrera ordaindu beharko da, ADANO elkartearen alde. 16 eta 22 urte bitartekoek bortz euro ordaindu beharko dituzte eta hamasei urtetik beheitikoek doan izanen dute sarrera. Erremontisten kamisetak zozketatuko dituzte ikusleen artean.
Igande goizean Ororbian
Iruritako jaialdiaren aitzinetik, igande goizean, 11:00etan hasiko den jaialdian, txapelketako bertze partida jokatuko dute Matxin III.ak eta Agirrezabalak, estreinakoa duten Aimar Jabalera doneztebarraren eta Aimar Saldias oiztarraren kontra. Jaialdiko lehen partidan, Eloi Otxandorena doneztebarra eta Baztan, Oses eta Dabid Mitxeo doneztebarraren kontra ariko dira.
