Xanti Uterga doneztebarrak eta Agirrezabalak irabazi dute Iruñeko Alde Zaharreko erremonte profesionaleko bederatzigarren txapelketa, joan den ortziralean Labriten jokatutako final estuan Matxin III.ari eta Aimar Saldias oiztarrari 35-33 irabazita.
Azken markagailuak erakusten duen bezala, final parekatua eta lehiatua izan zen eta horren erakusgarri, hamar aldiz berdindu zutela. Azken berdinketa 32-32koa izan zen, baina azken aldera, gorriek gehiago asmatu zuten.
Gisa honetara, urtebete eskasean hirugarren txapela jantzi dute Utergak eta Agirrezabalak, 2022ko Nafarroako XVI txapelketa eta Azpeitiko erremonte profesionaleko txapelketa irabazi baitzituzten. Xanti Uterga doneztebarrak jokatu dituen azken sei finaletatik bortz irabazi ditu. Hain zuzen, joan den urteko Iruñeko Alde Zaharreko txapelketaren finala galdu zuen Garcesekin bikote eginez.
Ortziraleko jaialdia hasteko omenaldia eskaini zitzaion Beñat Rodriguez, e-Remonte enpresako erremontista ohiari. Jaialdian parte hartu zuten zortzi erremontistek erremonteekin egindako arkuaren azpitik sartu zen kantxara. Jaialdiko lehen partidan, Jon Sagaseta iruritarrak eta Ionek 35-33 irabazi zieten Aimar Jabalera eta Markel Leatxe doneztebarrei.