Dirulaguntza presentzialki edo online eskatzen ahal izanen da, baina aipatu bezala, oraindik eskaria egiteko prozedura ez dute martxan paratu. Eta zehazki, urtarrilaren 1ean hasita hiru urte bete artekoek hartzen ahalko dute. Gobernuak jakinarazi duenez, laguntza hiru urte baino guttiagoko haurrak dituzten familien % 65ek hartuko du, eta kanpoan geldituko dira bertzelako laguntzak hartzen dituztenak. Haur bakoitzeko emanen dute ehun euroko dirulaguntza hori.
Laguntza eskatzeko Nafarroan bizitzea eta erroldatua izatea nahitaezkoa izanen da, eskaera aurkezterakoan eta guttienez sei hilabete lehenagotik. Gainerakoan, 45.000 euro bitarteko errenta duten familiek hartuko dute laguntza, diru kopuru hori pertsona bakarrarengatik heldu baldin bada, edo 70.000 euro bitarteko errenta duten familiek ere bai, errenta hori pertsona bat baino gehiagotik heldu baldin bada. Laguntza bateragarria izanen da PFEZa edo pertsona fisikoen errentaren gaineko zerga egiterakoan hiru urte edo guttiagoko umeak izateagatik egiten duten zerga arintzearekin.
Bertzetik, haurra harrera familian dagoen kasuetan ere eskatzen ahalko dute laguntza, eta umearen zaintzaz arduratzen denarentzat izanen da. Zaintza partekatua duten kasuetan, berriz, bi gurasoek erabaki beharko dute nor izanen den dirulaguntza eskatuko duena eta nor dirulaguntza hartuko duena.