Euskal Herriko sokatira txapelketa bukatzeko, martxoko lehen asteburuan, larunbatean, martxoak 4, junior eta 23 urtez beheitiko txapelketa jokatuko dute Abadiñon (Bizkaia). Amaiurko taldea 23 urtez beheitikoan lehiatuko da. Igandean, martxoak 5, txapelketa mistoa (580 kilo) jokatuko da Ibarran (Gipuzkoa). Hau izanen da talde gehien bilduko dituen txapelketa, hamabi guztira. Amaiur eta Beti Gazterekin batera, bina talde paratuko dituzte goma gainean Abadiñok, Gaztedik eta Ibarrak eta bana Antsoain, Badaiotz, Berriozar eta Goiherrik.
Munduko txapelketara
Ondotik, martxoaren 8tik 11ra jokatuko dute Ipar Irlandako Parkgate herri ttikian Munduko sokatira txapelketa. Astelehenean hartzekoa dute bertara joateko hegaldia Beti Gazteko tiralariek, baita bertze zenbait taldetan (Antsoain, Berriozar eta Beti Gazten ere) ariko diren amaiurtarrek ere. Asteartean pisaketak izanen dituzte eta asteazken eta ortzegunean klub arteko txapelketa jokatuko dute eta ortzirale eta larunbatean nazioartekoa. Lesakako Beti Gaztek ordezkatuko du Basque Country kategoria gehienetan.