Emakumezkoen 500 kiloko finalean, bi jardunaldietan nagusi izan den Beti Gazterekin batera, Ibarra, Gaztedi, Badaiotz, Amaiur eta Abadiño ariko dira.
Gizonezkoen pisurik arinenean, berriz, Beti Gazte izanen da eskualdeko ordezkari bakarra eta Abadiño, Berriozar, Gaztedi, Goiherri, Ibarra, Ñapurrak eta Txantrearekin lehiatuko da.
Orain arte jokatu diren txapel guzien jabe egin da Beti Gazte: gizonezkoak 680, 640 eta 600 kilotan eta emakumeak 540 kilotan. Asteburu honetako biak lortuko balitu, mistoa bakarrik faltako litzaioke Lesakako klubari, lehen aldiz Euskal Herriko txapel guztien jabe egiteko.
Gazteak eta mistoa martxoko lehen asteburuan
Martxoko lehen asteburuan, larunbatean, martxoak 4, junior eta 23 urtez beheitiko txapelketa jokatuko dute Abadiñon (Bizkaia) eta igandean, martxoak 5, txapelketa mistoko (580 kilo) finala Ibarran (Gipuzkoa). Hau izanen da talde gehien bilduko dituen txapelketa, hamabi guztira. Amaiur eta Beti Gazterekin batera, bina talde paratuko dituzte goma gainean Abadiñok, Gaztedik eta Ibarrak eta bana Antsoain, Badaiotz, Berriozar eta Goierrik.