Iruñeko Alde Zaharreko IX. Erremonte txapelketako lehen partida jokatu zuten ortziralean Iruñeko Labrit pilotalekuan eta Xanti Uterga doneztebarrak eta Agirrezabalak 33-35 irabazi zieten Zeberio II.a eta Ioni, markagailua irauli ondotik.
Izan ere, 23-14 galtzen ari ziren Uterga eta Agirrezabala, baina Doneztebeko aurrelariak agintea hartu eta markagailua iraultzea lortu zuten urdinek, 33-35 irabazteko.
Txapelketa nagusiko partidaren aitzinetik, e•remonte taldean debutatu berri duten erremontista gazteen arteko partida jokatu zen. Xuban Iturregi iruritarrak eta Atarrabiako Asier Baztanek 30-20 irabazi zieten Jon Sagaseta iruritarrari eta Markel Leatxe doneztebarrari.
Iruñeko Alde Zaharreko IX. txapelketako bigarren jardunaldia otsailaren 24an, ortziralean 19:00etan Labriten hasiko den jaialdian jokatuko dute Matxin III.a eta Aimar Saldias oiztarrak, Aimar Jabalera doneztebarraren eta Barricart-en kontra.
