Euskal Herriko goma gaineko zortzinakako sokatira txapelketak bere bidean segitzen du eta asteburu honetan jardunaldi bikoitza izan dute Bizkaian. Larunbatean 500 kiloko emakumeen lehen jardunaldia jokatu zuten Abadiñon eta igandean 600 kiloko gizonezkoen bigarrena Turtziozen. Bietan Beti Gaztek irabazi zituen tiraldi guztiak.
Larunbatean, emakumezkoen 500 kiloko kategorian lehen jardunaldia jokatu zuten. Zazpi taldea aritu ziren eta Beti Gaztek 7 puntuak lortu zituen, tiraldi guztiak irabazita. Bigarren postuan berdindu egin zuten Ibarrak eta Gaztedik (5,5 puntu), laugarren Amaiur izan zen (4 puntu), bosgarren postuan berdindu zuten Badaiotz eta Abadiñok (2,5 puntu) eta Txantrea zazpigarren izan zen (1 puntu).
Igandean, berriz, Turtziozen 600 kiloko gizonezkoen bigarren jardunaldia jokatu zuten. Lehen jardunaldian bezala, hemen ere Beti Gazteko mutilak nagusitu ziren. Otsailaren 18an Berangon (Bizkaia) jokatuko den finalerako sailkatu ziren sei talde onenak. Lesakarrekin batera, Gaztedi, Goiherri, Ñapurrak, Abadiño eta Amaiur ariko dira finalean.