Gizonezkoen 680 kiloko txapela jantzi ondotik, Euskal Herriko 640 kiloko goma gaineko sokatira txapelketan ere agintari hasi da Beti Gazte. Larunbatean Busturian (Bizkaia) jokatutako lehen jardunaldian tiraldi guztiak irabazi eta 8 puntu eskuratu zituen.
Pisurik astunenean bezala, Laukizko Gaztedi izan zuten areriorik gogorrena lesakarrek. Bizkaitarrek lortu zuten bigarren postua (7 puntu). Hirugarren Zuraide A izan zen (6 puntu), laugarren Ñapurrak (5 puntu), bosgarren postuan berdindu egin zuten Amaiurrek eta Abadiñok (3,5na puntu), zazpigarren Zuraide B izan zen (2 puntu) eta Ibarra zortzigarren (puntu 1).
Gizonezkoen kategoria honetako eta emakumeen 540 kiloko bigarren jardunaldia urtarrilaren 22an Burgelun (Araba) jokatuko dute eta bi kategoria hauetako finalak urtarrilaren 28an Pobesen (Araba).