Jaialdia ortziralean 17:00etan hasiko da Labriten, hirugarren mailako finalarekin: Larraun klubeko Huizi eta Oreja, Paz de Zigandako Iturbide eta Olazen kontra ariko dira.
Bigarren mailako finalean, berriz, belaunaldi arteko lehia izanen da. Beteranoak, Lekunberriko Xuban Armendariz (37 urte) eta Berriozarko Jose Luis Tabar (40 urte), Irurtzun klubekoak, Atarrabiako Jon Lakabe eta Zigako Aimar Primen kontra ariko dira. Hogeina urte dituzte Paz Ziganda klubean ari diren bi piotari hauek.
Lehen mailako finalean, azkenik, Zugarraldeko David Landa eta Aitor Alduntzin, Oberenako Javier Oskoz (Lantz) eta Igantziko Joseba Aldaberen kontra ariko dira. Aldabe Munduko txapeldun da gaur egun eta maila nagusiko laugarren finala jokatuko du aurten. Nafarroako frontball txapelketa ere irabazi du aurten Aldabek. Aipatzekoa da Aldabek 2019an eta 2021an ere irabazi duela txapelketa hau, orduan Oian Canabal herritarrarekin batera eta 2018an txapeldunorde izan ziren bi igantziarrak.
Aurtengo bigarren eta lehen mailako finalak zuzenean emanen ditu Navarra Televisión telebistak, 18:00etatik aitzinera.